नारायणगढ–बुटवल सडक विस्तार आयोजनाको भौतिक प्रगति तेस्रो पटक म्याद सकिन लाग्दा पनि ६९ प्रतिशतमै सीमित रहेको छ। उक्त आयोजनाको पूर्वी खण्डका सूचना अधिकारी शिव खनालका अनुसार हाल चौथो पटक म्याद थपको प्रक्रिया अगाडि बढाइएको छ।
चाइना स्टेट कन्स्ट्रक्सन कर्पोरेसन प्रालिले २०७५ माघ २४ गते सम्झौता गरी निर्माण सुरु गरेको यो आयोजना २०७९ साउन २२ गते भित्र सम्पन्न गर्ने लक्ष्य लिइएको थियो। तर निर्धारित समयमा काम सम्पन्न नहुँदा दोस्रो पटक म्याद २०८१ साउन ८ गते सम्मका लागि थपियो। फेरि पनि निर्माण कार्य नसकिएपछि तेस्रो पटकको म्याद २०८२ साउन ८ गते सम्मका लागि पुनः थपिएको थियो।
तर, हालसम्म ६९ प्रतिशत मात्र काम सम्पन्न भएको हुँदा आयोजना समयमा सम्पन्न हुने सम्भावना टाढिएको छ। ११३ किलोमिटर लम्बाइको सडकलाई दुई खण्डमा विभाजन गरी काम अघि बढाइएको यस परियोजनामा निर्माण कम्पनीले ५७६ दिन अर्थात् करिब १ वर्ष ७ महिनाको म्याद थप माग गरेको छ। तर सरकारी निकायले केवल एक वर्षको म्याद थप गर्न तयारी गरिरहेको जानकारी प्राप्त भएको छ।
