जापानको दक्षिणी भागमा अवस्थित टोकारा टापु श्रृङ्खलामा पछिल्ला दुई सातामा ९०० भन्दा बढी भूकम्पीय झड्का महसुस गरिएको छ। भूकम्पका कारण हालसम्म कुनै ठूलो भौतिक क्षति नभए पनि, यसले स्थानीयवासीको जनजीवनमा गहिरो असर पुर्याएको छ।
जापान मौसम विज्ञान एजेन्सी (JMA) का अनुसार, भूकम्पीय गतिविधि जुन २१ देखि सुरु भई लगातार तीव्र रूपले जारी रहेको छ। अपराह्न ३:३० बजे ५.५ म्याग्निच्यूडको भूकम्प गएको पुष्टि भएपछि JMA ले आपतकालीन पत्रकार सम्मेलनसमेत गरेको थियो।
भूकम्प तथा सुनामी अवलोकन विभागका निर्देशक आयताका एबिताका अनुसार, “टोकारा वरपरको समुद्र क्षेत्र अत्यधिक सक्रिय बनेको छ र कहिले शान्त हुन्छ भन्ने अनुमान लगाउन कठिन छ।”
‘ट’ को त्रास: टोकारामा निद्राविहीन रात, परिवार सरसङ्ग्रहको तयारी
टोकारा गाउँ प्रशासनका अनुसार, निरन्तरका झड्काहरूका कारण बासिन्दाहरू आतंकित र निद्राविहीन भएका छन्। “हामी राम्ररी सुत्न सकेका छैनौँ, थकित भएका छौँ,” एक स्थानीयवासीले बताएका छन्।
एक बासिन्दाले एमबिसी प्रसारकलाई भनेका छन्, “टापु लगातार हल्लिएको जस्तो लागिरहेको छ। बालबालिकालाई अन्यत्र सार्ने वा घर खाली गर्नेबारे सोच्नुपरेको अवस्था छ।”
JMA का अभिलेखअनुसार, यस्ता उच्च आवृत्तिका भूकम्पीय गतिविधि सन् २०२३ सेप्टेम्बरमा पनि देखिएको थियो, जब ३४६ भूकम्प रेकर्ड गरिएको थियो। तर यो पटक त्योभन्दा करिब तीन गुणा बढी संख्या देखिएको छ।
विशेषज्ञहरूले भने सावधानी अपनाउन, आपतकालीन योजना बनाइराख्न, र सरकारी निर्देशनको पालना गर्न स्थानीयवासीलाई आग्रह गरेका छन्।
