एसिसी मेन्स यू–१६ इस्ट जोन कप क्रिकेट प्रतियोगितामा साविक विजेता नेपालले सेमिफाइनलमा आयोजक मलेसियासँग प्रतिस्पर्धा गर्ने भएको छ। समूह ‘ए’ विजेता बनेको नेपालले समूह ‘बी’को उपविजेता मलेसियासँग सेमिफाइनल खेल सिलेगंर ट्रफ क्लबको मैदानमा बिहान पौने आठ बजे सुरु हुनेछ।
नेपालले समूह चरणमा चारवटै खेलमा विजय हासिल गर्दै उत्कृष्ट प्रदर्शन गरेको हो। मलेसियाले भने तीन जित र एक हारको नतिजासहित अन्तिम चारको यात्रा तय गरेको हो।
प्रतियोगितामा १० देश सहभागी भएका थिए, जसलाई दुई समूहमा विभाजन गरिएको थियो। दोस्रो सेमिफाइनलमा हङकङ र सिङ्गापुरबीच प्रतिस्पर्धा हुने भएको छ।
नेपालको यु–१६ टिमले प्रतियोगिता अवधिभर उत्कृष्ट बलिङ र ब्याटिङ प्रदर्शन गर्दै आएको छ, जसले फाइनल प्रवेशको सम्भावना बलियो बनाएको छ।
फाइनल खेल असार २१ गते हुने तय भएको छ। नेपाल मलेसियाविरुद्ध जित निकाल्दै पुनः उपाधि रक्षा गर्ने लक्ष्यमा छ।