लोकप्रिय कमेडियन मेक्सम गौडेलको स्वास्थ्यमा सुधार आएको छ। केही महिनादेखि प्याङ्क्रियाजसम्बन्धी समस्याले पीडित गौडेलले फेसबुकमार्फत जानकारी दिँदै आफ्नो स्वास्थ्य क्रमिक रूपमा सुधार हुँदै गएको र आफू चाँडै नै दर्शकमाझ फर्किन लागिएको बताएका छन्।
गौडेलले सामाजिक सञ्जालमार्फत स्वास्थ्य लाभको कामना गर्ने सबैप्रति आभार प्रकट गर्दै भनेका छन्, “आवश्यक उपचार र केही समयको आरामपछि म हजुरहरूले माया गर्नुभएको काममा फर्किँदैछु।”
तीन महिनाअघि पेट दुखाइपछि गौडेल बानेश्वरस्थित सिभिल अस्पतालमा दुई साता भर्ना भएका थिए। स्वास्थ्यमा सुधार नआएपछि उनलाई दिल्लीस्थित मेदान्त अस्पताल लगिएको थियो, जहाँ उपचारपछि अब उनको अवस्था सामान्य बन्दै गएको हो।
गौडेल ‘कमेडी नाइट विथ च्याम्पियन्स’ को चार एपिसोड पूरा गरेपछि बिरामी परेका थिए। उनी ‘कमेडी च्याम्पियन’ बाट चर्चामा आएका थिए र त्यसपछि ‘छक्कापञ्जा ५’ तथा ‘फेरि रेशम फिलिली’ जस्ता सफल फिल्महरूमा समेत अभिनय गरिसकेका छन्।
उनको स्वास्थ्य सुधारको खबरले कमेडी प्रेमी दर्शक, सहकर्मी कलाकार र फ्यानहरूमा खुसी छाएको छ। गौडेलको पुनरागमनले नेपाली मनोरञ्जन क्षेत्रमा फेरि ऊर्जा भर्ने अपेक्षा गरिएको छ।
