काठमाडौँ — नेपाली कांग्रेसका वरिष्ठ सांसद तथा उद्योगपति विनोद चौधरीले नेपाली बैंक तथा वित्तीय संस्थाहरुलाई विदेशमा शाखा खोल्ने सुविधा दिनुपर्नेमा जोड दिएका छन्। उनले हालको बाफिया (बैंक तथा वित्तीय संस्था सम्बन्धी ऐन) विधेयकमा त्यसको व्यवस्था नरहेको भन्दै पुनःलेखनको माग गरेका छन्।
सिंहदरबारमा बिहीबार बसेको प्रतिनिधिसभाको अर्थ समितिको बैठकमा सांसद चौधरीले बाफिया विधेयक दुई वर्षअघि तयार पारिए पनि अहिलेको आर्थिक यथार्थसँग मेल नखाने बताए। “समय परिवर्तन भएको छ, दृष्टिकोण पनि फेरिनुपर्छ,” उनले भने, “नेपालका बैंकलाई विदेशमा शाखा खोल्ने बाटो खोल्नुपर्छ।”
उनका अनुसार नेपाली बैंकले अस्ट्रेलिया, मलेसिया लगायतका देशहरूमा शाखा खोलेर प्रवासी नेपालीहरूसँग प्रत्यक्ष सम्पर्कमा जानु पर्ने आवश्यकता छ। “नेपालीको पुँजी किन विदेशी बैंकमा राख्नु? आफ्नै बैंकमार्फत संकलन गर्न पाइएन भने राष्ट्रिय पूँजी बाहिरिन सक्छ,” चौधरीको तर्क थियो।
बाफिया विधेयकमा सुधारको माग
विधेयक पुनः ड्राफ्ट गर्नुपर्ने भन्दै चौधरीले यसमा समावेश गरिनुपर्ने महत्वपूर्ण बुँदाहरूको उल्लेख गरे। तीमध्ये बैंकको अन्तर्राष्ट्रियकरण, डिजिटल कारोबारको विस्तार, प्रविधिमैत्री वित्तीय प्रणाली तथा प्रवासी नेपालीसँगको आर्थिक सम्बन्ध सुदृढीकरण मुख्य छन्।
“वर्तमान कानुनी संरचना धेरै हदसम्म सीमित छ,” उनले भने, “समृद्ध नेपाल निर्माणमा वित्तीय क्षेत्रको अन्तर्राष्ट्रिय विस्तार अपरिहार्य छ।”
बैंक तथा वित्तीय संस्था सम्बन्धी ऐनले बैंकलाई के-कस्ता काम गर्न सक्ने भन्ने प्रष्ट पार्ने कानुनी आधार हो। तर अहिलेको विधेयकले आधुनिक प्रवृत्तिहरूलाई पर्याप्त समेट्न नसकेको भन्दै सांसद चौधरीलगायत सांसदहरूले असन्तुष्टि व्यक्त गरेका छन्।
प्रवासी नेपाली र विदेशी लगानीमा पहुँच
नेपाली बैंकहरूलाई विदेशमा शाखा खोल्न दिने हो भने प्रवासी नेपालीहरूको बचतलाई राष्ट्रिय विकासमा उपयोग गर्न सकिने संभावना चौधरीले औंल्याएका छन्। “बैंकहरूले केवल नेपालभित्र मात्र सीमित हुनु हुँदैन,” उनले स्पष्ट पारे, “यसले राष्ट्रको आर्थिक स्वायत्तता पनि सुदृढ पार्छ।”
अर्थ समितिमा भएको छलफलमा अन्य सांसदहरूले पनि विधेयकमा समसामयिक आवश्यकता समावेश गर्नुपर्नेमा सहमति जनाएका छन्।
