एसीसी पुरुष यू–१६ इष्ट जोन कप क्रिकेट प्रतियोगिताको फाइनल खेलमा नेपाल र सिंगापुर आमनेसामने हुने भएका छन्। नेपाली युवा टोलीले सेमिफाइनलमा साविक उपविजेता मलेसियालाई ९ विकेटले पराजित गर्दै चौथो पटक उपाधिनजिक पुगेको हो।
मलेसियाले दिएको ९१ रनको लक्ष्य नेपालले ११.४ ओभरमा १ विकेटको क्षतिमा भेट्टाउँदै शानदार जित निकालेको हो।
आजै सम्पन्न दोस्रो सेमिफाइनलमा सिंगापुरले हङकङलाई ४ विकेटले पराजित गर्दै फाइनलमा प्रवेश गरेको हो। यससँगै प्रतियोगितामा नेपाल र सिंगापुरबीच दोस्रोपटक प्रतिस्पर्धा हुने भएको छ। समूह चरणमा नेपालसँग पराजित भएको सिंगापुर उपाधि प्रतिस्पर्धामा पुनः सामना गर्न तयार भएको छ।
हङकङले दिएको १६९ रनको लक्ष्य सिंगापुरले ३८.५ ओभरमा ६ विकेट गुमाउँदै भेट्टाएको हो। पहिले ब्याटिङ गरेको हङकङले ४३ ओभरमा १६८ रन बनाएको थियो।
नेपालले समूह ‘ए’ को विजेता र सिंगापुरले उपविजेताको रूपमा सेमिफाइनलमा स्थान बनाएका थिए। यसैसँग समूह बी का दुवै टोली प्रतियोगिताबाट बाहिरिएका छन्।
अब सबैको ध्यान असार २१ गते हुने उपाधि भिडन्तमा केन्द्रित भएको छ। नेपाली टिमको अपराजित यात्राले उपाधिको आशा बलियो बनाएको छ।
