राष्ट्रिय स्वतन्त्र पार्टी (रास्वपा) का सभापति रवि लामिछानेमाथि गरिएको राजनीतिक कारबाहीको विरोधमा आज काठमाडौंमा आयोजित “राजनीतिक प्रतिशोधविरुद्ध जनताको हस्ताक्षर अभियान”मा देशका चर्चित कलाकारहरूले सहभागिता जनाएका छन्।
शुक्रबार राजधानीको कार्यक्रममा आधा दर्जनभन्दा बढी ख्यातिप्राप्त कलाकारहरू र संचारकर्मीहरूको उल्लेखनीय उपस्थिति देखिएको हो। यस हस्ताक्षर अभियानमार्फत रविको पक्षमा खुला समर्थन जनाइएको छ।
रास्वपाको आधिकारिक फेसबुक पेजमा सार्वजनिक तस्बिरअनुसार आजको कार्यक्रममा सहभागी भएर हस्ताक्षर गर्ने प्रमुख कलाकारहरूमा कृष्ण मल्ल, खगेन्द्र लामिछाने, खेम सेञ्चुरी, राजाराम पौडेल, किरण केसी, रामचन्द्र अधिकारी, अशोक शर्मा र निर्देशक दीपेन्द्र के खनाल रहेका छन्।
चलचित्र पत्रकार प्रकाश सुवेदीको पनि कार्यक्रममा उपस्थिति रहेको छ, जसले संचारकर्मीसमेत यस अभियानमा एकीकृत रूपमा जुटेको सन्देश दिएको छ।
हस्ताक्षर अभियानमा रविका निकटतम व्यक्तित्व, उनकी पत्नी निकिता पौडेल समेत सक्रिय रूपमा सहभागी भइन्। उनी यस अभियानको भावनात्मक प्रतिनिधिका रूपमा उपस्थित भइन् र सहभागीहरूसँग संवादमा उत्रिईन्।
राजनीतिक हस्तक्षेप र असमान व्यवहारविरुद्धको यो अभियान राजधानी काठमाडौंबाट शुरू गरिएको भए पनि आगामी दिनमा देशव्यापी रूपमा विस्तार गरिने कार्यक्रम आयोजकहरूले बताएका छन्।
उक्त कार्यक्रममा सहभागी कलाकारहरूले “न्यायको पक्षमा बोल्नु अपराध होइन” भन्ने भावनाका साथ हस्ताक्षर गरेका थिए। उनीहरूका अनुसार यो समर्थन कुनै राजनीतिक रंग होइन, तर नागरिक स्वतन्त्रताको पक्षमा उभिने जमात हो।
यो अभियानले सामाजिक सञ्जालमा समेत व्यापक प्रतिक्रिया पाएको छ। विशेषतः रास्वपाका समर्थक र स्वतन्त्र विचार राख्ने युवाहरूले यो हस्ताक्षर अभियानलाई सकारात्मक समर्थन दिइरहेका छन्। अभियानले जनभावना र लोकतान्त्रिक मूल्यको सम्मानका लागि सडकदेखि संचारमाध्यमसम्म आवाज उठाउन सकिने सन्देश दिएको छ।
