नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले आज स्व. गिरिजाप्रसाद कोइरालाको १०२औं जन्मजयन्तीका अवसरमा शीतल निवासमा आयोजित विशेष कार्यक्रममा सहभागी भई लोकतान्त्रिक आन्दोलन र शान्ति प्रक्रियामा कोइरालाको योगदानलाई स्मरण गरे। कार्यक्रममा सम्बोधन गर्दै उनले वर्तमान सरकार, संसद तथा न्यायालयको गतिविधिप्रति गम्भीर असन्तुष्टि व्यक्त गरे।
प्रचण्डले विस्तृत शान्ति सम्झौताको भावना अनुरूप मुलुक अघि बढ्न नसकेको आरोप लगाउँदै सो सम्झौता मार्फत जनतासँग गरिएको कबुलअनुसार शासन प्रणाली सञ्चालन नभएको बताए। “जनतासँग जे कबुल गरियो, त्यो कत्तिको कार्यान्वयन भयो भन्ने प्रश्न अहिले उठ्नुपर्ने अवस्था आएको छ,” उनले भने।
कार्यक्रममा अध्यक्ष प्रचण्डले स्पष्ट रूपमा लोकतन्त्रको सार र गणतन्त्रको उद्देश्य प्रति समर्पित भावनाको कमी रहेको औंल्याए। उनले गिरिजाप्रसाद कोइरालाको सोचअनुसार पारदर्शी न्याय व्यवस्था, सबल संसद र जनमुखी शासन आजको नेतृत्वबाट प्रतिबिम्बित हुन नसकेको दाबी गरे।
उनका अनुसार, “अहिलेको संसदीय अभ्यास, सरकारको निर्णय र न्यायालयको व्यवहारले लोकतान्त्रिक मूल्यलाई सम्मान गरिरहेको छैन।” उनले विगतका प्रतिबद्धता र वर्तमान कार्यान्वयनबीचको गम्भीर अन्तरप्रति चिन्ता जनाए।
उनले थपे, “गिरिजाबाबुले जनताको पक्षमा लिएका निर्णयले गणतन्त्रको आधार तयार गरेको थियो, तर आज हामी त्यो मार्गबाट विचलित हुँदै गएका छौं।”
कार्यक्रमको अन्त्यतिर प्रचण्डले आफू जनताको समस्या बुझ्न हुलाकी राजमार्ग र मध्यपहाडी लोकमार्ग केन्द्रित अभियानमा निस्किएको जानकारी दिए। उनले वर्तमान सरकार जनताको अपेक्षाअनुसार अघि बढ्न नसकेकोप्रति असन्तुष्टि जनाउँदै भने, “जनता सन्तुष्ट छैनन्, अब नेतृत्वले आत्मसमीक्षा गर्न जरुरी छ।”
उनले सत्ता पक्षलाई परिस्थिति गम्भीर भएको सन्देश दिँदै, सच्चिनु पर्ने बेला आएको चेतावनी पनि दिए। न्यायालय, संसद र कार्यपालिका सबैले गम्भीर समीक्षा गर्दै जनमुखी शासनको मार्ग अवलम्बन गर्नुपर्ने उनले बताए।
