स्वास्थ्यमन्त्री प्रदीप पौडेल वीर अस्पतालबाट डिस्चार्ज भएका छन्। थाइल्याण्ड भ्रमणबाट फर्किएपछि ज्वरो आएर अस्पताल भर्ना गरिएका मन्त्री पौडेलको स्वास्थ्यमा उल्लेखनीय सुधार भएपछि आज अस्पतालबाट घर फर्किएका हुन्।
वीर अस्पतालका निर्देशक प्रा.डा. दिलीप शर्माले दिएको जानकारीअनुसार मन्त्री पौडेलको उपचार अस्पतालकै चिकित्सक टोलीको प्रत्यक्ष निगरानीमा सम्पन्न भएको थियो। डा. शर्माकै नेतृत्वमा रहेको चिकित्सक समूहले आवश्यक परीक्षण र औषधोपचार गरी स्वास्थ्यमा सुधार सुनिश्चित गरेको हो।
मन्त्री पौडेल यही असार १४ गते थाइल्याण्डको कार्यक्रममा सहभागी भई फर्किएपछि अचानक ज्वरो देखिएपछि वीर अस्पतालमा भर्ना भएका थिए। अस्पतालमा रहेका अवधिमा उनको नियमित स्वास्थ्य परीक्षण, औषधि सेवन र चिकित्सकीय सल्लाहअनुसार विश्राम गरिएको थियो।
स्वास्थ्यमा सुधार देखिएपछि अस्पतालले उनीलाई आज डिस्चार्ज गरेको हो। मन्त्रालयले मन्त्रीको स्वास्थ्य सामान्य रहेको र अब केही दिन घरमै विश्राम गर्ने बताएको छ।
अस्पताल स्रोतका अनुसार, उनको स्वास्थ्य स्थितिमा कुनै गम्भीर चिन्ता देखिएको छैन र आवश्यक परेमा पुनः स्वास्थ्य परीक्षण गरिने व्यवस्था गरिएको छ।
