स्वतन्त्र प्रकाशकहरूको समूहले युरोपेली आयोगमा गुगलविरुद्ध नयाँ प्रतिस्पर्धा विरोधी उजुरी दर्ता गरेका छन्, जसमा गुगलको AI Overviews सेवाले समाचार सामग्रीको दुरुपयोग गर्दै प्रकाशकहरूलाई गम्भीर आर्थिक र प्रतिस्पर्धात्मक क्षति पुर्याएको आरोप लगाइएको छ। उजुरीमा तत्कालीन अन्तरिम कदम चाल्न मागसमेत गरिएको छ, ताकि “अप्रतिवर्तनीय क्षति” रोक्न सकियोस्।
AI Overviews गुगलले प्रयोगकर्तालाई एआईद्वारा तयार गरिएका संक्षेप विवरणहरू दिने सेवा हो, जुन सामान्यतया वेबसाइट लिङ्कभन्दा माथि देखाइन्छ। यो सेवा विश्वका सयभन्दा बढी देशमा प्रयोग भइरहेको छ र गुगलले २०२४ को मे महिनादेखि यसमा विज्ञापनसमेत थपेको छ।
“Google आफ्नो AI Overviews सेवामा वेव सामग्री प्रयोग गरेर आफ्नो संक्षेप तयार गर्छ र ती मूल समाचार लिङ्कभन्दा माथि देखाउँछ,” उजुरीमा उल्लेख गरिएको छ। यसरी प्रकाशकको मौलिक सामग्री दर्शकको पहुँचभन्दा पर धकेलिएको र ट्राफिक, पाठक संख्यामा गिरावट आएको बताइएको छ।
इन्डिपेन्डेन्ट पब्लिशर्स एलायन्स, फक्सग्लोभ लीगल, र द मूभमेन्ट फर एन ओपन वेबजस्ता संस्थाहरूले हस्ताक्षर गरेको यस उजुरीमा भनिएको छ, “प्रकाशकहरूसँग आफ्ना सामग्री AI प्रशिक्षण वा संक्षेपका लागि प्रयोग हुन नदिन अस्वीकार गर्ने कुनै विकल्प छैन।” यदि सामग्री प्रयोग हुन नदिन खोजे, उनीहरूको सामग्री खोज नतिजाबाटै हट्न सक्छ।
पत्रकारिता संकटमा : AI ओभरभ्यूले स्वतन्त्र समाचारलाई असर ?
Foxglove का सह-कार्यकारी निर्देशक रोजा कर्लिङले बताए अनुसार, “स्वतन्त्र पत्रकारिता अस्तित्वको संकटमा छ। गुगलको AI Overviews यसका लागि खतरा बनेको छ।” उनले युरोपेली आयोग तथा अन्य अन्तर्राष्ट्रिय नियामक निकायहरूलाई कदम चाल्न आग्रह गरिन्।
उता गुगलले भने AI ओभरभ्यूजले प्रयोगकर्ताहरूलाई अझ धेरै प्रश्न गर्न प्रेरित गरेको र यसले व्यवसाय र सामग्रीलाई नयाँ अवसर प्रदान गरेको जिकिर गरेको छ। गुगल प्रवक्ताले भने, “सर्च ट्राफिकका विषयमा गरिएको धेरै आलोचना अपूर्ण र पक्षपाती डेटामा आधारित हुन्छ।”
यसअघि अमेरिकी एउटा एडटेक कम्पनीले समेत गुगलको AI ओभरभ्यूले आफ्ना साइट र सदस्यता संख्यामा गिरावट ल्याएको भन्दै अमेरिकी अदालतमा मुद्दा दायर गरेको थियो।
यस्तो उजुरी र आन्दोलनले डिजिटल सूचना व्यवस्थामा AI को भूमिका, यसको कानुनी सीमाना, र प्रकाशकहरूको हक र अस्तित्वमाथि गम्भीर बहस उत्पन्न गराएको छ। विज्ञहरूले यो प्रवृत्तिले समाचारको स्वतन्त्रता र विविधतामाथि दीर्घकालीन असर पार्न सक्ने चेतावनी दिइरहेका छन्।
-एजेन्सीको सहयोगमा
