मोल्डोवाकी राष्ट्रपति माइया सान्डुले यही सेप्टेम्बरमा हुने संसदिय चुनावलाई देशको युरोपेली युनियन (EU) सदस्यता यात्राको निर्णायक मोड भएको बताउँदै मोल्डोवाली जनतालाई एकताबद्ध भई सही निर्णय गर्न आग्रह गरेकी छन्।
२७ सदस्यीय EU राष्ट्रहरूसँग आयोजित पहिलो शिखर सम्मेलनमा बोल्दै उनले, “शान्ति र समृद्धि आफैँ उत्पन्न हुँदैन। त्यसका लागि संयुक्त प्रयास र एकता आवश्यक छ।” उनले मोल्डोवाको भविष्य आफ्नै जनताको हातमा रहेको स्पष्ट पारिन्।
सान्डुको पार्टी “पार्टी अफ एक्सन एण्ड सोलिडारिटी (PAS)” ले सेप्टेम्बरमा हुने निर्वाचनमा संसदमा बहुमत जोगाउने संघर्ष गरिरहेको छ। पूर्व सोभियत मुलुक मोल्डोवा युक्रेन र रोमानियाबीच अवस्थित छ र सान्डु यसलाई सन् २०३० सम्म EU सदस्य बनाउने लक्ष्यमा अडिग छन्।
प्रमुख विपक्षी समाजवादी पार्टी र त्यसका रूस समर्थक गठबन्धनले PAS विरुद्ध कडा चुनौती दिइरहेका छन्। गत वर्षको राष्ट्रपति चुनावमा सान्डुले अत्यन्त न्यून मत अन्तरले विजय हासिल गरेकी थिइन् भने EU सदस्यता समर्थनमा भएको जनमत संग्रह पनि मुस्किलले ५० प्रतिशतको सीमा नाघेको थियो।
सान्डु र उनको पार्टीले युक्रेनमाथि रूसले गरेको आक्रमणको विरोध गर्दै आफ्नै देशमा पनि रूसले अस्थिरता फैलाउने प्रयास गरिरहेको आरोप लगाएका छन्। अर्कोतर्फ, रूसले भने मोल्डोवाका धेरै नागरिकले अझै पनि मास्कोसँग सम्बन्ध राख्न चाहेको दाबी गर्दै सान्डुमाथि रूसविरोधी भावना फैलाएको आरोप लगाएको छ।
EU को सहयोग : आर्थिक सहायतासँगै सम्पर्क सुधार
यस शिखर सम्मेलनमा युरोपेली आयोग प्रमुख उर्सुला भन डेर लायन र युरोपेली परिषद्का प्रमुख एन्टोनियो कोस्टा उपस्थित थिए। कार्यक्रममा EU ले आर्थिक वृद्धि योजनाअन्तर्गत २७० मिलियन युरो (करिब ३१८ मिलियन अमेरिकी डलर) को पहिलो किस्ता अनुदान प्रदान गरेको घोषणा गर्यो।
साथै, मोल्डोवाली नागरिकलाई EU भित्र मोबाइल सम्पर्क गर्दा रोमीङ शुल्क नलाग्ने व्यवस्था गर्ने सहमति पनि भएको छ, जसले व्यापारिक र सामाजिक सम्पर्क थप सशक्त बनाउने आशा गरिएको छ।
चुनाव परिणाम अनिश्चित देखिँदै गएको छ। सर्वेक्षणहरूका अनुसार कुनै एक दलले स्पष्ट बहुमत ल्याउन कठिन हुनेछ। यस्तो अवस्थामा PAS ले अन्य प्र-युरोपेली पार्टीहरूसँग गठबन्धन गर्नुपर्ने सम्भावना बढेको छ।
सान्डुले चेतावनी दिँदै भनिन्, “युरोपेली युनियन यहाँ सुरु भइसकेको छ। तर हामी रोकिने निर्णय ग¥यौं भने त्यो सबै समाप्त हुन सक्छ।” उनले मोल्डोवाली जनतालाई आगामी शरद ऋतुलाई परिवर्तनको निर्णायक मोडका रूपमा उपयोग गर्न आग्रह गरिन्।
