नेकपा एमालेका नेता तथा पूर्वमन्त्री महेश बस्नेतले राष्ट्रिय स्वतन्त्र पार्टी (रास्वपा) सभापति रवि लामिछानेको पक्षमा सञ्चालित हस्ताक्षर अभियानप्रति कडा आपत्ति जनाएका छन्। उनले उक्त अभियानमा बालबालिकाको दुरुपयोग भएको भन्दै सामाजिक सञ्जालमार्फत तीव्र आलोचना गरेका छन्।
बस्नेतले लेखेका छन्, “बिस्कुट र कुरकुरे दिएर बालबालिकाबाट रविको पक्षमा हस्ताक्षर गराउने, युट्युबर बोलाएर समर्थन गराउनेजस्ता गतिविधि केवल बाल अधिकारको उल्लंघन होइन, समाजमा गलत सन्देश दिने आपराधिक प्रवृत्ति हो।”
पूर्वमन्त्री बस्नेतले बालबालिकालाई राजनीतिक औजार बनाउने कार्यलाई पूर्णतः अस्वीकार्य भन्दै गम्भीर अपराधको संज्ञा दिएका छन्। उनले स्पष्ट पारे, “बाल अधिकार हनन गर्ने यिनै व्यक्ति आफूलाई ‘सुधारक’ भन्न लाज मान्दैनन्। यस्तो कार्यले कानूनको शासनमाथि नै चुनौती दिन्छ।”
उनले थप भने, “सहकारी ठगीजस्ता गम्भीर आरोप खेपिरहेका व्यक्तिहरूले कानुनको प्रक्रिया नअपनाई बालबालिकाको प्रयोग गर्दै आफूमाथिका अपराध लुकाउने प्रयास गर्नु झनै आपत्तिजनक छ।”
बस्नेतको भनाइ अनुसार, कुनै पनि राजनीतिक वा सामाजिक आन्दोलनमा कानुनी मर्यादा र नैतिक जिम्मेवारी स्पष्ट हुनुपर्छ, विशेषतः जब बालबालिकाजस्तो संवेदनशील समूहको कुरा आउँछ।
महेश बस्नेतको आलोचना त्यसैबेला आएको हो जब रवि लामिछानेविरुद्ध पछिल्लो समय राजनीतिक मुद्दाहरू चुलिँदै गएका छन् र लामिछाने समर्थकहरूले हस्ताक्षर अभियानमार्फत सार्वजनिक समर्थन बटुल्ने प्रयास गरिरहेका छन्।
यस सन्दर्भमा, बालबालिकाको सहभागिताको भिडियोहरू सामाजिक सञ्जालमा भाइरल बनेपछि उक्त अभियानप्रति गम्भीर प्रश्न उठ्न थालेका छन्। बालअधिकारसम्बन्धी संस्थाहरूले पनि यस विषयमा चासो प्रकट गरिरहेका छन्।
