अमेरिकाका राष्ट्रपति डोनाल्ड ट्रम्पले चिनियाँ कम्पनी बाइटडान्सको स्वामित्वमा रहेको टिकटकको अमेरिकी कारोबारबारे चीनसँग वार्ता यही हप्ता सुरु हुने बताएका छन्। ट्रम्पले अमेरिकी मिडियालाई बताएअनुसार, सोमबार वा मंगलबारदेखि राष्ट्रपति सी जिनपिङ वा उनका प्रतिनिधिसँग सीधै वार्ता सुरु हुने अपेक्षा गरिएको छ।
ट्रम्पले भने, “हामीसँग लगभग एउटा सम्झौता तयार भइसकेको छ। अब चीनसँगको छलफल बाँकी छ, जुन हामी सोमबार वा मंगलबारदेखि सुरु गर्नेछौं।”
गत महिना ट्रम्प प्रशासनले चीनमा आधारित कम्पनी बाइटडान्सलाई आगामी सेप्टेम्बर १७ सम्मको समय सीमा दिएको थियो, जसअन्तर्गत टिकटकको अमेरिकी कारोबार कुनै अमेरिकी कम्पनीमा स्थानान्तरण गर्नुपर्नेछ।
यसअघि अमेरिकामा टिकटकको अमेरिकी शाखालाई अलग कम्पनी बनाउने प्रस्ताव आएको थियो, जुन अमेरिकी लगानीकर्ताको बहुमत स्वामित्वमा सञ्चालन हुने योजना थियो। तर ट्रम्पले चीनमाथि नयाँ भन्सार शुल्क घोषणा गरेपछि चीनले उक्त योजना स्वीकृत नदिने संकेत दिएको थियो।
ट्रम्पले वार्ताको सफलतामा पूर्ण भरोसा नरहेको स्वीकार गरे पनि सकारात्मक आशा व्यक्त गरेका छन्। उनले भने, “म विश्वस्त त छैन, तर मलाई लाग्छ यो सम्भव छ। राष्ट्रपति सीसँग मेरो सम्बन्ध राम्रो छ, र मलाई लाग्छ यो डिल चीन र अमेरिकाका लागि लाभदायक हुनेछ।”
डिलको औपचारिकता पूरा गर्न चीनको स्वीकृति आवश्यक पर्न सक्ने भन्दै ट्रम्पले वार्ता नै यसको प्रमुख माध्यम हुने उल्लेख गरेका छन्।
डिजिटल संप्रभुताको बहस
टिकटक जस्तो लोकप्रिय एपको स्वामित्वबारेको विवादले विश्वव्यापी रूपमा डिजिटल संप्रभुता, डेटा सुरक्षा, र प्रविधि व्यापार नीति सम्बन्धी बहसलाई नयाँ उचाइमा पु-याएको छ। ट्रम्प प्रशासनका पछिल्ला कूटनीतिक र व्यापारिक कदमहरूले चीन–अमेरिका सम्बन्धमा पुनः चिसोपन ल्याउने संकेत दिएको छ।
