नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आगामी राजनीतिक यात्रा युवाहरूको साथमा तय गर्ने घोषणा गरेका छन्। शनिबार पार्टी केन्द्रीय कार्यालय पेरिसडाँडामा पर्सा–काठमाडौं सम्पर्क समन्वय समितिद्वारा आयोजित पार्टी प्रवेश कार्यक्रममा बोल्दै प्रचण्डले माओवादी आन्दोलनको ऐतिहासिक यात्रामा युवाको भूमिका निर्णायक रहेको स्मरण गरे।
उनले भूमिगत संघर्षका दिनमा गीत–संगीत र युवाको साहसले जनतालाई प्रेरित गरेको उल्लेख गर्दै भने, “हामीले भाषणभन्दा बढी गीतबाट जनतालाई उठाएका थियौं। आज पनि युवाशक्ति र सांस्कृतिक चेतनाले नै परिवर्तन सम्भव छ।”
प्रचण्डले आगामी निर्वाचनमा संगीतको पनि महत्वपूर्ण भूमिका हुने विश्वास व्यक्त गर्दै परिवर्तनको यात्रामा नयाँ पुस्ताको योगदान अपरिहार्य हुने बताए। “क्रान्तिको झण्डा उठाउँदा हामीसँग युवाको जोश र गीतको आवाज थियो,” उनले भने।
कार्यक्रममा पर्सा जिल्लाका विभिन्न स्थानबाट आएका कार्यकर्ताहरूले माओवादी केन्द्रमा सामूहिक प्रवेश गरे। अध्यक्ष प्रचण्डले पार्टी प्रवेश गर्ने सबैलाई स्वागत गर्दै देशको समृद्धि, समानता र सामाजिक न्यायका लागि सँगै अघि बढ्न आह्वान गरे।
युवाको जोश, सिर्जनशीलता र नवीन विचारलाई पार्टीको संगठनात्मक पुनर्संरचना र चुनावी मोर्चामा उपयोग गरिने संकेत प्रचण्डको सम्बोधनबाट झल्किएको छ। उनले पार्टीलाई केवल राजनीतिक नारा होइन, सामाजिक रूपान्तरणको आन्दोलनका रूपमा पुनः सक्रिय बनाउने वाचा गरे।
प्रचण्डले स्पष्ट गरे, “आजको नेपालले युवाशक्तिमा आधारित राजनीतिक संस्कार चाहन्छ। त्यो संस्कार हामी निर्माण गर्छौं।”
