नेपाली कांग्रेसका महामन्त्री गगनकुमार थापाले देशप्रति सकारात्मक दृष्टिकोण राख्न र जिम्मेवारी लिन विद्यार्थीहरूलाई आह्वान गरेका छन्। शनिबार राजधानीमा आयोजित एक कार्यक्रममा बोल्दै उनले देशमा राम्रो हुन सक्ने सम्भावनालाई आत्मसात् गर्दै आलोचनात्मक सोच र सक्रिय सहभागिताको महत्त्वमा जोड दिए।
थापाले देशमा न राम्रै भएको छ न त पूरै झुर भएको भन्दै दुवै प्रकारका अतिवादी सोचलाई अस्वीकार गर्न आग्रह गरे। “कोही भन्छन् देश बर्बाद भयो, कोही भन्छन् खतरा भयो – दुबै कुरा नपत्याउनुस्,” उनले भने, “देशमा केही राम्रो भएको छ, केही गरिन बाँकी छ। राम्रो भएकोमा धन्यवाद, नभएकोमा गुनासो गर्नुस्। बाँकी म गर्छु भनेर अगाडि आउनुस्।”
गगन थापाले विद्यार्थीहरूलाई थकाइ, भागबन्डा र समझौताबाट टाढा रहन आग्रह गरे। “नथाक्नुस्, नभाग्नुस्, नगल्नुस्। अडिएर बस्नुस्। नयाँ कुरा सिक्नुस्। क्रिटिकल हुनुस्, रमाइलो गर्न पनि नछोड्नुस्,” उनले भने।
उनको भनाइ अनुसार, देश निर्माणमा युवाको भूमिका निर्णायक हुन्छ र अबको पुस्ताले आफुभन्दा बढी योगदान दिन सक्नेमा उनले विश्वास व्यक्त गरे। “अब आउने पुस्ताले मभन्दा राम्रो काम गर्छ भन्नेमा म ढुक्क छु,” उनले स्पष्ट पारे।
थापाको यो सन्देशले नेपालको वर्तमान राजनीतिक, सामाजिक तथा शैक्षिक परिवेशमा युवाले लिने दृष्टिकोण र भूमिका कस्तो हुनुपर्छ भन्नेबारे नयाँ बहस जन्माएको छ। उनले केवल भाषणमा सीमित नहुन आग्रह गर्दै व्यवहारिक जिम्मेवारी वहन गर्न विद्यार्थीलाई उत्प्रेरित गरेका छन्।
