नागरिक उन्मुक्ति पार्टी (नाउपा) बाट प्रतिनिधित्व गर्दै सरकारमा सहभागी भएका पर्यटन राज्यमन्त्री अरुण चौधरीले आज साँझ ५ बजे प्रधानमन्त्री केपी शर्मा ओलीलाई भेटी राजीनामा बुझाउने तयारी गरेका छन्।
नाउपाका एक नेताका अनुसार, चौधरी आजै बालुवाटार पुगेर औपचारिक रूपमा सरकारबाट बाहिरिने छन्। शनिबार बसेको नाउपाको संसदीय दलको बैठकले सरकारबाट बाहिरिने निर्णय गरेसँगै चौधरीको राजीनामा प्रक्रिया औपचारिक बन्दै गएको हो।
अरुण चौधरी पूर्वसांसद तथा जनजाति नेतृत्वको पक्षधर नेताका रूपमा चिनिन्छन्। उनले नागरिक उन्मुक्ति पार्टीबाट सरकारमा समावेश भई पर्यटन राज्यमन्त्रीको जिम्मेवारी सम्हाल्दै आएका थिए।
नाउपाको पछिल्लो निर्णय अनुसार, पार्टी नेतृत्वले सरकारको नीतिगत असहमति, सत्ता साझेदारीको अस्पष्टता र राजनीतिक प्राथमिकता नदेखिएको आरोप लगाउँदै सरकारबाट बहिर्गमनको नीति लिएको हो।
चौधरीको राजीनामासँगै ओली नेतृत्वको गठबन्धन सरकारमा फेरि एकपटक सत्ता समीकरणको अस्थिरता देखिएको छ। नाउपाको बहिर्गमनले आगामी दिनमा अन्य साना दलहरूको भूमिकामा पनि असर पार्न सक्ने अनुमान गरिएको छ।
