नेपाली कांग्रेसका नेता एनपी साउदले पार्टीले आगामी २०८४ सालको निर्वाचनका लागि कुनै तयारी नगरेको गम्भीर आरोप लगाएका छन्। आइतबार ललितपुरको सानेपामा जारी पार्टी केन्द्रीय कार्यसमिति बैठकमा बोल्दै उनले पार्टीको संगठनात्मक स्थिति र रणनीतिक दिशा दुवैमा गम्भीर कमजोरी रहेको औंल्याएका हुन्।
नेता साउदले भने, “हेर्दा हेर्दै ०८४ पनि नजिक आइसकेको छ। तर कांग्रेस त्यसका लागि तयारी अवस्थामा छैन। गैरकांग्रेस मतहरूसँग दूरी बढ्दो छ, जुन मत घट्ने संकेत हो।”
साउदले पार्टीभित्र अनुशासन, गुटबन्दी र असमान व्यवहारप्रति असन्तोष व्यक्त गर्दै एकपक्षीय कारबाहीको अभ्यासले कार्यकर्ताहरूमा निराशा बढाएको बताए। उनले अनुशासन सबैमा समान रूपमा लागु हुनुपर्नेमा जोड दिए।
“संगठन बलियो नबनेसम्म नेताहरूको घुमाइ मात्र पर्याप्त छैन,” साउदले भने, “गुटबन्दी अन्त्य गरेर पार्टीलाई समयानुकूल अद्यावधिक गर्न नेतृत्वले तुरुन्तै कदम चाल्नुपर्छ।”
स्थानीय तहसम्मको कमजोरी
साउदले आफूले केन्द्रीय कार्यसमितिबाट प्रतिनिधित्व गरेको सर्लाही जिल्लामा पार्टीको कुनै पनि औपचारिक बैठक नबसेकोप्रति दुःख व्यक्त गरे। “१४ औं महाधिवेशनपछि आजसम्म बैठकसमेत नभएको अवस्था छ। अधिवेशन अधुरो छ। यो संगठनको कमजोरीको संकेत हो,” उनले भने।
संविधान र ओली नेतृत्वको आलोचना
साउदले दुईतिहाइको बहुमत पाएको केपी शर्मा ओली नेतृत्वको सरकार संविधान संशोधनसम्बन्धी सात बुँदे सहमति कार्यान्वयनमा असफल भएको आरोप पनि लगाए। उनले अहिले राजनीतिक दलहरू र संविधानमाथि आक्रमण भइरहेका बेला कांग्रेसले मौन बस्न नहुने धारणा व्यक्त गरे।
“यो केवल दलमाथिको आक्रमण होइन, संविधानमाथिको नै प्रहार हो। कांग्रेसले अब स्पष्ट आवाज उठाउन जरुरी छ,” उनले भने।
नेता साउदको टिप्पणीले कांग्रेसभित्रको आन्तरिक असन्तुलन, रणनीतिक कमजोरी र नेतृत्वगत चुनौतीको वास्तविकता उजागर गरेको छ। २०८४ को निर्वाचन नजिकिँदै गर्दा संगठनात्मक सुधार, अनुशासनको समान कार्यान्वयन र गुटबन्दी अन्त्य कांग्रेसका लागि अनिवार्य एजेन्डा बन्नु पर्ने स्पष्ट सन्देश साउदको अभिव्यक्तिमा देखिन्छ।
