प्रधानमन्त्री केपी शर्मा ओलीले हुम्ला जिल्लाको खार्पुनाथ गाउँपालिका–५ स्थित च्वाखोला नदीमा निर्माण सम्पन्न भएको बेलिब्रिज उद्घाटन गर्दै सिमकोटलाई औपचारिक रूपमा राष्ट्रिय सडक सञ्जालसँग जोडेको घोषणा गरेका छन्।
सडक सञ्जालमा नजोडिएको नेपालकै एकमात्र जिल्ला हुम्लाको सदरमुकाम सिमकोट अब राष्ट्रिय पूर्वाधार नेटवर्कमा समावेश भएसँगै भौगोलिक एकीकरणको दिशामा ऐतिहासिक कदम अगाडि बढेको हो।
उक्त बेलिब्रिज कर्णाली कोरिडोर अन्तर्गतको योजना हो, जसको निर्माण कार्य नेपाली सेनाको चौध बाइनी निर्माण टोलीले चैत १० गतेदेखि सुरु गरी असार १० गतेभित्र सम्पन्न गरेको थियो। छोटो अवधिमा सम्पन्न कार्यप्रति प्रधानमन्त्री ओलीले नेपाली सेनाको योगदानप्रति प्रशंसा व्यक्त गरे।
भौतिक पूर्वाधार तथा यातायात मन्त्री देवेन्द्र दाहाल समेत उद्घाटन कार्यक्रममा सहभागी भएका थिए।
हिमाली जिल्लामा विकासको प्रवेशद्वार
सिमकोट सडक सञ्जालमा जोडिएपछि अब हुम्ला जिल्लामा आर्थिक क्रियाकलाप, पूर्वाधार विकास र सेवाप्रवाहमा गुणात्मक सुधार आउने अपेक्षा गरिएको छ। स्थानीय बासिन्दाहरूले यस उपलब्धिलाई “ऐतिहासिक दिन”को रूपमा स्वागत गरेका छन्।
हुम्लाको भौगोलिक दुर्गमता, विशेष गरी लामो समयसम्म सडक सुविधा नपुगेका स्थानहरूको विकास अवरुद्ध रहँदा सिमकोटजस्ता क्षेत्र समृद्धिबाट वञ्चित थिए। अब, यो अवस्थाको अन्त्य भएको सरकारी अधिकारीहरूको भनाइ छ।
प्रधानमन्त्री ओलीको नेतृत्वमा उद्घाटन गरिएको च्वाखोला बेलिब्रिजले सामाजिक एकीकरण, यातायात सुलभता र राष्ट्रिय एकताको सन्देश दिएको छ। राष्ट्रिय सुरक्षा संस्थाले निर्माण कार्य सफलतापूर्वक सम्पन्न गर्नु, भौगोलिक कठिनाइको बीचमा पनि विकास सम्भव छ भन्ने उदाहरण बनेको छ।
