नेकपा (एमाले) का नेता तथा पूर्वमन्त्री गोकुल प्रसाद बाँस्कोटाले पार्टीभित्रको मतान्तर र भोगाइलाई स्मरण गर्दै निषेधको संस्कृति अस्वीकार्य रहेको धारणा सार्वजनिक गरेका छन्। उनले सामाजिक सञ्जालमार्फत पार्टी नेतृत्वलाई संकेत गर्दै भनेका छन्, “पार्टीमा निषेधको निषेध लागू हुनै सक्दैन।”
फेसबुक पोस्टमार्फत बाँस्कोटाले ०३९ देखि ०७८ सालसम्मको राजनीतिक यात्रा उल्लेख गर्दै पार्टीका भिन्न चरणहरूमा आफूले भोगेका अनुभवबारे संकेत गरेका छन्।
उनले लेखेका छन् –
“०३९–४५, ०४७–४९, ०५२–०५४, ०५८–५९, ०६५, ०७१ र ०७७–७८ मध्ये एउटा नजिकबाट हेरियो, सुनियो। अरुमा संलग्न भयौं, भोगियो। को कस्ता थिए, कता थिए र छन् – त्यो पनि थाहा छ।”
बाँस्कोटाले आफ्ना भनाइ पूर्णरूपमा नखोली “केही बाँकी राखेर बोल” भन्ने शैलीमा सन्देश दिनु पार्टीभित्रको असहमति र गुटगत चेतावनीको सङ्केतका रूपमा हेरिएको छ।
गुटबन्दी र नेतृत्वप्रतिको असन्तुष्टि ?
हालै एमालेभित्र विभिन्न नेताहरूबीचको विचार–विमर्श, कार्यशैलीको भिन्नता र आगामी महाधिवेशनका सम्भावित समीकरणहरूबारे आन्तरिक असन्तोष देखा परेको छ। बाँस्कोटाले “मतान्तरबीच मुस्कुराउँदै सँगै यात्रा गर्न सक्नुपर्छ” भनेको अभिव्यक्तिले सहिष्णुता र सहकार्यको आग्रहसहित इशारात्मक आलोचना समेत बोकेको देखिन्छ।
गोकुल बाँस्कोटाको यो अभिव्यक्ति नेकपा (एमाले) भित्र विचार–प्रवाहको स्वतन्त्रता, नेतृत्वप्रतिको चेतावनी र आन्तरिक एकताको चुनौतीलाई सतहमा ल्याउने प्रयासको रूपमा विश्लेषण गरिएको छ। निषेधको राजनीति अन्त्य गर्दै विचार आदानप्रदानलाई स्वीकार्नुपर्ने सन्देश उनका शब्दमा स्पष्ट झल्किन्छ।
