काठमाडौं महानगरपालिकाका प्रमुख बालेन्द्र शाह (बालेन) ले बिहीबार बिहान पूर्वराष्ट्रपति विद्यादेवी भण्डारीसँग बुढानीलकण्ठस्थित उनको निवासमा भेट गरेका छन्। पछिल्ला राजनीतिक समीकरण र महाभन्दा महत्वपूर्ण यो भेट विभिन्न कोणबाट चर्चा भइरहेको छ।
पछिल्लो समय प्रधानमन्त्री केपी शर्मा ओलीसँगको सम्बन्ध चिसिएको पृष्ठभूमिमा बालेनले पूर्वराष्ट्रपतिसँगको भेटलाई गहिरो सन्देशको रूपमा हेरिएको छ। नेकपा (एमाले) का अध्यक्षसमेत रहेका ओलीसँग सार्वजनिक रूपमा आलोचनात्मक धारणा राख्दै आएका बालेन हाल राजनीतिक रूपमा एक्लिएको अवस्था अनुभव गरिरहेका छन्।
स्रोतका अनुसार, पूर्वराष्ट्रपति भण्डारीले एमालेको साधारण सदस्यता नविकरण गर्दै पुनः सक्रिय राजनीतिमा फर्किएकी छन्। यस्तै बेला बालेनको यो भेट ‘शक्ति सन्तुलन’ मिलाउने प्रयासका रूपमा लिइएको छ।
महानगरको आन्तरिक व्यवस्थापनमा समेत बालेन समस्यामा छन्। जनप्रतिनिधिदेखि कर्मचारीसम्म उनको विरोधमा उत्रिएका छन् भने सामाजिक सञ्जालमा एमाले समर्थक पंक्तिहरू खुलेर उनीविरुद्ध अभियान चलाइरहेका छन्।
बालेनले यसअघि प्रधानमन्त्री ओलीको कामशैली र अभिव्यक्तिको खुलेर आलोचना गरेका थिए, जसले उनी र एमालेबीचको दूरीलाई झन् बढाएको थियो।
यो भेटलाई केही विश्लेषकहरूले बालेनको ‘राजनीतिक धरातल पुनः गढ्ने प्रयास’ र एमालेभित्रको आन्तरिक समीकरणलाई पुनः परिभाषित गर्ने संकेतका रूपमा हेरेका छन्।
