लोकप्रिय छोटो भिडियो प्लेटफर्म टिकटक अमेरिकी बजारमा बिक्रीको तयारीसँगै नयाँ संस्करणको एप निर्माण गरिरहेको छ। द इन्फोर्मेसनले आइतबार स्रोत उद्धृत गर्दै यो रिपोर्ट सार्वजनिक गरेको हो।
स्रोतका अनुसार, चीनको ByteDance स्वामित्वको टिकटकले अमेरिकामा सेप्टेम्बर ५ मा नयाँ एप स्टोर संस्करण सार्वजनिक गर्ने योजना बनाएको छ। यसअघि अमेरिकी राष्ट्रपति डोनाल्ड ट्रम्पले आगामी सोमवार वा मंगलवार चीनसँग टिकटक सम्झौताबारे वार्ता सुरु गर्ने बताएका थिए।
| “हामीसँग टिकटकको बिक्रीसम्बन्धी सम्झौता लगभग तयार भइसकेको छ,” ट्रम्पले शुक्रबार पत्रकारहरूसँग भनेका थिए।
सेप्टेम्बर १७ सम्म ByteDance ले टिकटकको अमेरिकी कारोबार अमेरिकी लगानीकर्तालाई हस्तान्तरण गर्नुपर्ने ट्रम्पको समयसीमा अझै कायम छ।
नयाँ एप प्रयोग गर्न अमेरिकी प्रयोगकर्ताले अनिवार्य रूपमा नयाँ संस्करण डाउनलोड गर्नुपर्नेछ, हालको संस्करण मार्च २०२६ सम्म मात्र काम गर्नेछ।
तर यो समयरेखा परिवर्तन हुन सक्ने सम्भावना रहेको रिपोर्टमा उल्लेख छ।
मिडियाले यो रिपोर्टको स्वतन्त्र पुष्टि गर्न सकेको छैन भने टिकटकले टिप्पणी दिन अस्वीकार गरेको छ।
यो प्रस्तावित सम्झौता यस वर्षको सुरुआतमा निकै नजिक पुगेको थियो, जसअनुसार अमेरिकी लगानीकर्ताको बहुमत स्वामित्वमा आधारित नयाँ कम्पनीमार्फत टिकटकको अमेरिकी कारोबार सञ्चालन हुने भनिएको थियो। तर, ट्रम्प प्रशासनले चिनियाँ सामानमाथि उच्च शुल्क लगाउने घोषणा गरेपछि चीनले उक्त सम्झौतालाई अनुमोदन नदिने संकेत दिएको थियो, जसले प्रक्रिया स्थगित गर्यो।
राष्ट्रपति ट्रम्पले चीनसँगको सहमति अपरिहार्य हुने स्पष्ट संकेत पनि दिएका छन्।
यो विकासले अमेरिकी डिजिटल सुरक्षासम्बन्धी चासो र चीनसँगको व्यापारिक तनावबीच टिकटकको भविष्य अझ अनिश्चित बनाएको छ। प्रयोगकर्ताहरूका लागि अबको महिना “नयाँ एपमा माइग्रेट” गर्ने तयारीको हुन सक्नेछ।
