नेकपा (माओवादी केन्द्र) का नेता तथा पूर्वमन्त्री सुदन किरातीले प्रमुख विपक्षी दल नेकपा (एमाले) फुटको संघारमा रहेको दाबी गरेका छन्।
नेपाली रेडियो नेटवर्कको ‘नेपाली बहस’ कार्यक्रममा पत्रकार ऋषि धमलासँगको कुराकानीमा बोल्दै उनले एमाले आफैं गम्भीर अन्तरविरोधमा फसेको उल्लेख गर्दै भने,
| “एमाले नै आफैं फुट्न आटेको छ, अनि हामी कहाँ मिल्ने ?”
किरातीका अनुसार वाम एकताको नाममा जनतालाई झुक्याउने कोसिस भइरहेको छ, जबकि भित्रैभित्रै एमालेभित्र विभाजनको तयारी चलिरहेको छ।
किरातीको भनाइ:
| “भएकै फुट्दैछ यहाँ, अनि एकताको कुरा के? जनताले पनि त पत्याउनुपर्यो नि? वाम एकता हुँदैछ कि देशमा हाम एकता हुँदैछ भनेर शंकाको नजरबाट जनताले हेरिराखेका छन्।”
उनको कथनले एमाले नेतृत्वमा विद्यमान असन्तुष्टि र गुटबन्दीप्रति संकेत गरेको छ। यद्यपि एमालेले औपचारिक रूपमा कुनै प्रकारको विभाजनको सम्भावनालाई अस्वीकार गर्दै आएको छ।
विगत केही सातायता नेपाली राजनीतिक वृत्तमा वाम दलहरूबीच पुनः वाम एकता सम्भावनाबारे चर्चा हुँदै आएको छ। तर, एमालेभित्र देखिएको आन्तरिक असमझदारी, विशेषगरी नेतृत्वको कार्यशैलीप्रति असन्तुष्टिले एकताको प्रयासमै चुनौती खडा गरेको छ।
किरातीको भनाइले एमालेभित्रको संभावित फुट, माओवादीको वाम एकता रणनीति, र समग्र रूपमा नेपालको बाम राजनीति पुनः संरेखणतर्फ उन्मुख हुन सक्ने संकेत गर्छ।
यसैबीच, कतिपय राजनीतिक विश्लेषकहरू यो अभिव्यक्तिलाई राजनीतिक दबाब सिर्जनाको रणनीतिका रूपमा पनि हेरिरहेका छन्।
