परराष्ट्रमन्त्री डा. आरजु राणा देउवा र जर्मनीका विदेशमन्त्री डा. जोहान डेविड वेडफुलबिचबीच मङ्गलबार बर्लिनमा द्विपक्षीय भेटवार्ता सम्पन्न भएको छ। भेटमा नेपाल–जर्मनी सम्बन्ध, आर्थिक सहकार्य, लगानी प्रवर्द्धन, जलवायु परिवर्तन, र अन्तर्राष्ट्रिय मंचमा सहयोग जस्ता विषयमा विस्तृत छलफल भएको हो।
नेपाल–जर्मनी सम्बन्धमा उच्च प्रशंसा
परराष्ट्रमन्त्री डा. राणाले जर्मनीलाई नेपालको दीर्घकालीन विकास साझेदारका रूपमा स्मरण गर्दै, शिक्षा, स्वास्थ्य, पूर्वाधार र सामाजिक क्षेत्रमा दिएको सहयोगप्रति धन्यवाद व्यक्त गरिन्।
उहाँले द्विपक्षीय व्यापार विस्तार, निजी क्षेत्रको सञ्जाल सुदृढीकरण र नेपालमा रासायनिक मल कारखानाजस्ता उद्योगमा जर्मनीको प्रत्यक्ष लगानीको आह्वान गर्नुभयो।
सिधा हवाई उडानका लागि आग्रह
डा. राणाले नेपाल–जर्मनीबीचको प्रत्यक्ष हवाई सम्पर्कको अभावले पर्यटन क्षेत्रमा असर परिरहेको बताउँदै, सिधा उडान सुरु गर्न गम्भीर पहल गर्न जर्मनीको सहयोगको अपेक्षा गर्नुभयो।
उहाँले नेपाली वायुसेवा कम्पनीहरूलाई युरोपियन युनियन (EU) को उडान प्रतिबन्ध हटाउन सहयोग गर्न आग्रह गर्दै भनिन्:
| “नेपाल सरकारले नागरिक उड्डयन सुधारका लागि संसदमा विधेयक दर्ता गरिसकेको छ, जसले ICAO र EU दुवैको मापदण्ड पूरा गर्दछ।”
जर्मन विदेशमन्त्री डेविड वेडफुलबिचले यसबारे सक्दो सहयोग गर्ने प्रतिबद्धता जनाए।
अन्तर्राष्ट्रिय उम्मेदवारीमा सहयोगको आग्रह
परराष्ट्रमन्त्रीले नेपालले मानवअधिकार परिषद (2027–2029), आर्थिक–सामाजिक परिषद (2029–2031) र संयुक्त राष्ट्रसंघ सुरक्षा परिषदको अस्थायी सदस्य (2037–2038) मा उम्मेदवारी दिएको जानकारी दिँदै जर्मनीको समर्थनको आग्रह गरिन्। जवाफमा विदेशमन्त्री डेविडले समर्थन गर्ने आश्वासन दिनुभयो।
जलवायु न्यायमा सहकार्य
नेपालमा जलवायु परिवर्तनका गम्भीर प्रभावहरू परिरहेको उल्लेख गर्दै डा. राणाले जलवायु न्यायको अभियानमा जर्मनीसँग सहकार्यको अपेक्षा गर्नुभयो।
नेपालले हिमाली क्षेत्रको संवेदनशीलता उजागर गर्दै अन्तर्राष्ट्रिय समुदायसँग उत्तरदायित्व र स्रोतसाधनको माग गरिरहेको सन्दर्भमा जर्मनीजस्तो अग्रणी देशसँगको सहकार्यलाई अत्यन्त महत्वपूर्ण बताइन्।
नेपालको स्तरोन्नतिपछि दिगो सहयोगको अपेक्षा
डा. राणाले २०२६ मा नेपालले LDC (अत्यकम विकसित राष्ट्र) बाट स्तरोन्नति पाएपछि, दिगो विकासका लागि प्रविधि, स्रोत र वित्तीय सहायताको अपेक्षा गरिएको बताउँदै त्यसमा जर्मनी, EU र अन्य साझेदारको भूमिकामा जोड दिनुभयो।
परराष्ट्रस्तरीय यस भेटवार्तामा व्यापार, पर्यटन, अन्तर्राष्ट्रिय सहयोग र जलवायु न्याय जस्ता विषयहरू प्राथमिकतामा रहे। नेपाल–जर्मनी सम्बन्धलाई अझ गहिरो र व्यवहारिक बनाउने रणनीतिक संवादका रूपमा यो भेट सफल र सकारात्मक संकेतको रूपमा लिइएको छ।
