राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले हाल चर्चामा रहेको भिजिट भिसा प्रकरणमा सबैभन्दा धेरै आर्थिक लाभ नेकपा (माओवादी केन्द्र) ले लिएको आरोप लगाएका छन्। उनले माओवादी नेताहरूको संलग्नता उल्लेख गर्दै तत्कालीन विदेशमन्त्री नारायणकाजी श्रेष्ठ र पार्टी अध्यक्ष प्रचण्डकी सुपुत्रीसमेत अनुसन्धानको घेरामा पर्ने सम्भावना औंल्याए।
‘नागरिक फ्रन्टलाइन’ कार्यक्रम अन्तर्गत नागरिक दैनिकका प्रधानसम्पादक गुणराज लुइँटेलसँगको कुराकानीमा बोल्दै शाहीले भने,
| “भिजिट भिसा प्रकरणमा सबैभन्दा धेरै पैसा माओवादीले कमाएको हो। नारायणकाजीकै पालामा सबैभन्दा धेरै भिजिटमा गएका छन्। भोलि छानबिन हुँदै जाँदा नारायणकाजीजी आउँछन्, प्रचण्डजीका सुपुत्री पनि आउँछन्।”
उनले आरोपको समर्थनमा नारायणकाजी श्रेष्ठको विदेश मन्त्रालय सम्हालेको समयलाई उल्लेख गरे। सो समयकालमा ठूलो संख्यामा श्रमशक्ति भिजिट भिसाका नाममा विदेश पठाइएको र त्यसमा व्यापक अनियमितता भएको भन्दै शाहीले माओवादीलाई नै मुख्य लाभार्थीको रूपमा चित्रण गरे।
“ब्यागेज बोकेर राजनीति गाह्रो”
शाहीले नेपाली राजनीतिमा भ्रष्टाचार, अनियमितता, र व्यक्तिगत स्वार्थका कारण “ब्यागेज बोकेको” नेताहरूले निष्पक्ष निर्णय गर्न नसक्ने टिप्पणी पनि गरे।
उनले भने:
| “मैले कहीँ ठगेको छैन। ब्यागेजहरू राख्नु हुँदैन। त्यसले बार्गेनिङको आधार बनाउँछ। माओवादीले गृहमन्त्रीको राजीनामा मागेर भिजिट भिसा प्रकरणमा सशक्ति भयो, तर जब अग्नि सापकोटाको कुरा आयो, ब्याक हुनुपर्यो।”
शाहीको भनाइ अनुसार, माओवादीले रणनीतिक रूपमा भिजिट भिसा प्रकरणको प्रयोग गरे पनि आफ्नै नेतृत्वप्रति प्रश्न उठ्न थालेपछि पछि हट्न बाध्य भएको थियो।
ज्ञानेन्द्र शाहीको यो अभिव्यक्ति माओवादी केन्द्र र त्यसका शीर्ष नेताहरूलाई लक्षित गर्दै राजनीतिक दबाब सिर्जना गर्ने प्रयासको रूपमा हेरिएको छ। यो प्रकरण अब छानबिन, संसदीय बहस र न्यायिक प्रक्रियाको दिशामा प्रवेश गर्ने सम्भावना देखिन्छ।
-नागरिकन्यूजबाट साभार
