प्रधानमन्त्री केपी शर्मा ओलीले झापाको दमक नगरपालिकास्थित मदनडाँगी–ताराबारी–डिपु सडक स्तरोन्नति आयोजना आइतबार उद्घाटन गर्नुभएको छ। कार्यक्रममा बोल्दै उहाँले आफ्ना स्पेन भ्रमणबारे फैलाइएका “स्पेनमा मान्छे छाडेर आयो” भन्ने प्रचारलाई घटिया र झुटो भन्दै खण्डन गर्नुभएको हो।
उहाँले भने, “विकासको अभियान अगाडि बढिरहेको बेला केही अराजक तत्वले भ्रम फैलाइरहेका छन्। यस्ता प्रचारको जवाफ दिन आवश्यक ठान्दिनँ।”
उक्त सडक आयोजनालाई विश्व बैंकको सहयोगमा निर्माण गरिएको नेपालभरका १७ मध्ये एक नमूना सडकका रूपमा लिइएको छ। ४.८६ किलोमिटर लम्बाइको यो सडक रु ४४ करोड २४ लाखको लागतमा समयमै सम्पन्न भएको हो।
प्रधानमन्त्री ओलीले सडक उद्घाटनसँगै दमकको बेलडाँगी क्षेत्रमा विशाल रंगशाला निर्माण हुने घोषणा पनि गर्नुभयो।
उहाँले उल्लेख गर्नुभयो कि, “मेचीदेखि महाकालीसम्म विकासको लहर ल्याउने क्रममै यो आयोजना पनि महत्वपूर्ण उपलब्धि हो।”
यसै क्रममा, निशुल्क अनलाइन कक्षा प्रणालीमार्फत एसईई नतिजामा १३ प्रतिशत सुधार आएको उल्लेख गर्दै प्रधानमन्त्री ओलीले शिक्षा, पूर्वाधार, र प्रविधिमा सुधारको अभियान जारी रहेको बताए।
कार्यक्रममा भौतिक पूर्वाधार तथा यातायातमन्त्री देवेन्द्र दाहाल, कोसी प्रदेशका मुख्यमन्त्री हिक्मतकुमार कार्की, पूर्व मुख्यमन्त्रीहरू शेरधन राई र उद्दव थापालगायतको उपस्थिति थियो।
