संघीय मामिला तथा सामान्य प्रशासनमन्त्री राजकुमार गुप्ता घुस प्रकरणमा मुछिएपछि नेकपा (एमाले) भित्रैबाट उनलाई तत्काल बर्खास्त गर्न दबाब बढेको छ। ७८ लाख रुपैयाँको घुस डिलसम्बन्धी अडियो सार्वजनिक भएपछि, पार्टीभित्रको आन्तरिक असन्तुष्टि सतहमा आएको हो।
प्रधानमन्त्री एवम् एमाले अध्यक्ष केपी शर्मा ओलीलाई मन्त्री गुप्ताले पार्टीको छवि र सरकारको साखमा धक्का पुर्याएको भन्दै प्रभावशाली नेताहरूले ‘एक्शन लिनु पर्ने’ सुझाव दिएका छन्। यतिबेला ओली सरकारको एक वर्षे कार्यकाल पुरा भएको र मन्त्रिपरिषद् पुनर्गठनको तयारी भइरहेका बेला गुप्ताको भ्रष्टाचार काण्डले सरकारलाई थप संकटमा धकेलेको छ।
प्रधानमन्त्री ओलीको झापा भ्रमण, निर्णयको प्रतीक्षा राजधानीमा
प्रधानमन्त्री ओली अहिले गृहजिल्ला झापामा रहेका छन् भने आजै साँझसम्म काठमाडौं फर्किने कार्यक्रम रहेको बताइएको छ। बालुवाटार स्रोतका अनुसार, ओली फर्किएपछि गुप्ताको पदबारे ठोस निर्णय लिन सक्ने सम्भावना बढेको छ।
एमाले नेताहरूको आक्रोश: ‘अडियो प्रमाणकै भरमा किन ढिलासुस्ती?’
पार्टीभित्रकै वरिष्ठ नेताहरूले ‘सार्वजनिक अडियो नै स्पष्ट प्रमाण’ भएकोले गुप्तालाई बचाउन नहुने तर्क गरेका छन्। स्रोतका अनुसार, मन्त्री गुप्ताको नियुक्ति प्रक्रियामा हस्तक्षेप गर्दै भूमिसुधार मन्त्रालयसँग सम्बन्धित सरुवा रोक्न र नियुक्ति दिलाउन लाखौं घुसको लेनदेन गरिएको अडियो सार्वजनिक भएपछि, पार्टीभित्र आन्तरिक समीक्षा तीव्र बनेको छ।
सहकारीमन्त्री बलराम अधिकारी पनि ‘रेड जोन’मा
यसैबीच, घुस डिलको अडियोमा सहकारी तथा गरिबी निवारण मन्त्री बलराम अधिकारीको नाम समेत मुछिएको छ। उनले भने यस विषयमा ‘कुनै जानकारी नभएको’ दाबी गरेका छन्। तर पार्टीको स्रोतले उनी ‘रेड जोन’ मा परेको र आगामी मन्त्रिपरिषद् पुनर्गठनमा उनको स्थान पनि जोखिममा रहेको संकेत दिएको छ।
