वासिङटन – अमेरिकी राष्ट्रपति डोनाल्ड ट्रम्पले यसै वर्षभित्र उत्तर कोरियाका नेता किम जोङ उनसँग भेट्ने इच्छा रहेको बताएका छन्। उनले सोमबार पहिलोपटक ओभल अफिसमा दक्षिण कोरियाका राष्ट्रपति ली जे म्युङलाई स्वागत गर्दै यस्तो घोषणा गरेका हुन्।
“म यस वर्ष उहाँलाई भेट्न चाहन्छु। उपयुक्त समयमा किमसँग भेट हुने अपेक्षा गर्दछु,” ट्रम्पले पत्रकारहरूसँग भने।
यो वक्तव्य अमेरिकासँग दक्षिण कोरियाबीच चलिरहेको व्यापार विवादका बीच आएको हो। जुलाईमा भएको व्यापार सम्झौताले दक्षिण कोरियाली निर्यातलाई अमेरिकी ट्यारिफबाट जोगाए पनि आणविक ऊर्जा, सैन्य खर्च र करिब ३५० अर्ब डलरको लगानीसम्बन्धी विवाद अझै कायम छ।
दक्षिण कोरियाली राष्ट्रपतिको भ्रमण र व्यापारिक छलफल
ट्रम्पसँग भेटपछि राष्ट्रपति ली जे म्युङले अमेरिकी उच्च अधिकारी र दुवै देशका ठूला कम्पनीका CEO हरूसँग व्यापारिक सम्मेलनमा भाग लिए। यसै क्रममा, दक्षिण कोरियाको राष्ट्रिय ध्वजावाहक कोरियन एयरले आफ्नो इतिहासकै ठूलो सम्झौता अन्तर्गत १०३ वटा बोइङ विमान अर्डर गर्ने घोषणा गर्यो।
ओभल अफिसमा भेटघाट हल्का वातावरणमा भएको थियो। ट्रम्पसँग गोल्फ र व्यक्तिगत प्रसंगबारे समेत कुराकानी गर्दै, लिले पत्रकारहरूलाई बताए कि भेटअघि उनले ट्रम्पको १९८७ को आत्मकथा The Art of the Deal पढेका थिए।
लीले भने, “म आशा गर्छु तपाईंले कोरियाली प्रायद्वीपमा शान्ति ल्याउनुहुनेछ। यदि तपाईं किमसँग भेट्नुहुन्छ भने ‘ट्रम्प वर्ल्ड’ उत्तर कोरियामा निर्माण हुनेछ, जहाँ म गोल्फ खेल्न पाउँ र तपाईं साँचिकै शान्तिदूतको भूमिकामा रहनुहोस्।”
उत्तर कोरियाको मौनता र असन्तुष्टि
ट्रम्पको प्रस्तावबारे उत्तर कोरियाले तत्काल प्रतिक्रिया दिएको छैन। तर राज्य सञ्चालित मिडियाले भने अमेरिकी–दक्षिण कोरियाली संयुक्त सैन्य अभ्यासलाई “वाशिङटनले कोरियाली प्रायद्वीपलाई नियन्त्रणमा लिन खोजेको प्रमाण”का रूपमा प्रस्तुत गरेको छ।
सन् २०२५ जनवरीमा पदभार ग्रहण गरेदेखि ट्रम्पले किमसँग प्रत्यक्ष वार्ता पुनः सुरु गर्ने बारम्बार प्रयास गरे पनि, किमले उनका कलहरू बेवास्ता गर्दै आएका छन्। अघिल्लो कार्यकाल (२०१७–२०२१) मा भएका भेटघाटहरूले पनि आणविक कार्यक्रमबारे ठोस सम्झौता ल्याउन सकेका थिएनन्।
अन्तर्राष्ट्रिय सन्देश
ली जे म्युङको कार्यालयले दुवै नेताबीच जहाज निर्माणदेखि हत्या प्रयाससम्मका विषयमा छलफल भएको जानकारी दिएको छ। साथै, लिले ट्रम्पलाई आगामी अक्टोबरमा हुने एपेक (APEC) शिखर सम्मेलनमा सहभागी हुन निमन्त्रणा दिएका छन् र त्यही अवसरमा किमसँग सम्भावित भेटबारे सुझाव समेत राखेका छन्।
विश्लेषकहरूको भनाइमा, यदि ट्रम्प–किम भेट यसै वर्ष सम्भव भयो भने, यो कोरियाली प्रायद्वीपको शान्ति प्रक्रियामा नयाँ मोड ल्याउन सक्छ। तर उत्तर कोरियाको मौनताले वार्ताको भविष्य अझै अनिश्चित देखाइरहेको छ।
