केही खेलाडीलाई समेत कोरोना संक्रमण भएपछि इन्डियन प्रिमियर लिग(आईपीएल) अनिश्चित कालका लागि स्थगित गरिएको छ ।
इन्डियन प्रिमियर लिग गभर्निङ काउन्सिल र भारतीय क्रिकेट कन्ट्रोल बोर्ड (बीसीसीआई) को आकस्मिक बैठकले आईपीएल २०२१ स्थगित गर्ने निर्णय गरेको हो । खेलार्डी र कर्मचारीको स्वास्थ्य सुरक्षामा कुनै सम्झौता नगरिने उल्लेख गर्दै जारी आईपीएल स्थगित गरिएको बीसीसीआईले जनाएको छ ।
मंगलबार साँझ सनराइजर्स र मुम्बई इन्डियन्सबीचको खेल तय भएको थियो । सोमबार साँझ चेन्नई सुपर किंग्सका प्रमुख कार्यकारी अधिकृत काशी विश्वनाथन, बलिङकोच लक्ष्मीपति बालाजी र एक जना सफाइ कर्मचारीलाई कोरोना पुष्टि भएको थियो । त्यस्तै सोमबार नै कोलकाता नाइटराइडर्सका वरुण चक्रवर्ती र सन्दीप वारियरलाई पनि कोरोना देखिएको थियो ।
जारी सिजनमा दिल्ली क्यापिटल्स र पन्जाब किंग्सले ८/८ खेल खेलेका छन् भने बाँकी टिमले ७/७ खेल खेलेका छन् । त्यस्तै दिल्ली १२ अंकसहित शीर्ष स्थानमा रहेको छ भने चेन्नई र रोयल च्यालेन्जर्स बेंग्लोर १०/१० अंकसहित दोस्रो र तेस्रो स्थानमा रहेको छ ।
