काठमाडौं । सोमबार कोसी प्रदेशको पूर्वी क्षेत्रमा मनसुन प्रवेश गरिसकेको भए पनि पश्चिमतर्फ मनसुनी प्रणालीको प्रभाव भने पुगेको छैन। मौसम महाशाखाका अनुसार हाल पूर्वी भेगमा मात्र मनसुनी प्रणालीको प्रभाव छ भने देशका बाँकी स्थानमा स्थानीय वायु, पश्चिमी वायु तथा बिहार आसपास बनेको न्यून चापीय क्षेत्रको आंशिक प्रभाव छ। नेपालमा मनसुन जहिले पूर्वबाट भित्रिन्छ र बिस्तारै पश्चिमसम्म फैलिन्छ। अहिले मनसुन कोसी प्रदेशको पनि पूर्वी भागमा मात्र सीमित भएकाले त्यसयता मौसम बदली र वर्षाको सम्भावना कमै देखिएको छ। जसका कारण पश्चिम तराईमा अत्यधिक गर्मी भइरहेको मौसमविद् बताउँछन्।
त्यसो त काठमाडौँ उपत्यकामा पनि तुलनात्मक रुपमा गर्मी छ। सोमबार काठमाडौंको तापक्रम विराटनगरको भन्दा पनि बढी रह्यो । काठमाडौंको अधिकतम तापक्रम ३४.४ डिग्री सेल्सियस मापन भएको छ। तर ‘मनसुनको प्रभाव परेकाले विराटनगरमा भने तापक्रम कम घटिरहेको छ । सोमबार विराटनगरमा अधिकतम तापक्रम काठमाडौँको भन्दा कम अर्थात् ३३.६ डिग्री सेल्सियस मापन भएको छ। मौसमविद्हरुका अनुसार मनसुनी प्रणालीको प्रभाव नआउँदासम्म पश्चिमी तराईमा भने अझै केही दिन गर्मी नै रहने छ।
