काठमाडौं- लकडाउन सुरु भएदेखि सर्वसाधारणलाई निःशुल्क खाना खुवाइरहेको हाम्रो टीम नेपालले सोमबार दशैंको टीकाको दिन खुलामञ्चमा सर्वसाधारणलाई टीका लगाइदिएको छ । कोरोना महामारी र लकडाउनका कारण रोजगारी गुमाएपछि खुलामञ्चमा बाँडिने खाना नियमित खाँदै आइरहेकाहरुलाई सोमबार हाम्रो टीम नेपालले टीका लगाएर दक्षिणा दिएको छ भने मासुभात खुवाएको छ ।
खुलामञ्चमा दसैँको मुख्य दिन सोमबार पनि ३०० जना जति खाना खानेहरु थिए, उनीहरुलाई हाम्रो टीम नेपालका स्वयंसेवकहरुले टीका लगाएर खाममा दक्षिणा दिए । हाम्रो टीम नेपालका संस्थापक अध्यक्ष विमल पन्तले ७ महिनादेखि निरन्तर खुलामञ्चमा खाना खाइरहेकाहरुसँग दसैँ मनाउँदा सन्तुष्टि मिलेको बताए । कोरोना संक्रमणको कारण रोजगारी गुमाएकाहरु रोजगारीमा नफर्किएसम्म निःशुल्क खाना वितरण गरिने उनको भनाइ छ ।
