काठमाडौं- निषेधाज्ञामा जनताका गुनासा सम्बोधन गर्नका लागि कोरोना भाइरस (कोभिड–१९) संकट व्यवस्थापन केन्द्र (सिसीएमसी)ले संयन्त्र गठन गरेको छ । आज (विहिबार) सिसीएमीका निर्देशक उपप्रधानमन्त्री ईश्वर पोखरेले निर्देशन दिएपछि जनताका गुनासा, उजुरी तथा सुझावको तत्काल कार्यान्वयन गर्नका लागि संयन्त्र गठन गरिएको हो ।
उपप्रधानमन्त्री पोखरेलका प्रेस सल्लाहकार गणेश पाण्डेले जनताका गुनासा टोल फ्री नं ११४० मा फोन गरे २४ घण्टाभित्र समस्याको समाधान हुने गरी संयन्त्र गठन गरिएको जानकारी दिए । यस्तै शव व्यवस्थापनका लागि १०५ र एम्बुलेन्सका लागि १०२ मा सम्पर्क राख्न हुन सिसीएमसीको अनुरोध छ । विदेश जाने र विदेशबाट आउनेले सिसीएमसीको वेबसाइटमा पनि फारम भर्न सकिने र अनुरोध गरिएको छ ।
यसरी संक्रमण र बन्दाबन्दीमा परेका व्यक्तिलाई सहज बनाउनका लागि संयन्त्र गठन गरिएको हो । कोरोना भाइरस सङ्क्रमणको दर उच्च भएपछि सरकारले आजदेखि उपत्यकाका तीनवटै जिल्ला र देशका विभिन्न जिल्लाहरुमा निषेधाज्ञा जारी गरेको छ ।
