सञ्चार तथा सूचना प्रविधिमन्त्री एवं सरकारकी प्रवक्ता रेखा शर्माले आफ्नो सम्पत्ति विवरण सार्वजनिक गरेकी छन् । मंगलवार सार्वजनिक उनको सम्पत्ति विवरणमा श्रीमान् कृष्णध्वज खड्काको नाममा काठमाडौं कीर्तिपुर र प्युठानको घर रहेको उल्लेख छ ।
उनका अनुसार कीर्तिपुर नगरपालिका वडा नम्बर ७ जाखामा ६ आना जग्गा र साढे २ तलाको घर छ भने प्यूठानमा श्रीमान् कृष्णध्वजको नाममा एउटा र कृष्णध्वज, हरि खड्का, घमानसिंह खड्काकाे नाममा अर्काे घर छ । उनले यी घर प्राप्तिको स्रोत पैतृक, सगोल भनेर उल्लेख गरेकी छन् ।
त्यस्तै चल सम्पत्तिमा सुन ६ तोला र चाँदी २ तोला रहेको उल्लेख छ ।
मन्त्री शर्माले आफ्नो नाममा राष्ट्रिय वाणिज्य बैंकमा एक लाख ५० हजार, एभरेष्ट बैंकमा २८ हजार र क्यारिना ऋण तथा बचत सहकारी संस्थामा २० लाख रुपैयाँ बचत रहेको विवरण राखेकी छन् ।
उनले आफू, श्रीमान् र छोरीहरूका नाममा विभिन्न कम्पनीमा करिब १५ सय कित्ता शेयर रहेको उल्लेख गरेकी छन् । त्यस्तै उनले राष्ट्रिय वाणिज्य बैंकबाट ६५ लाख ऋण लिएको बताएकी छन् ।
उनले २०७७ साउनमा ३६ लाख तिरेर हुन्डाइकाे कार लिएकाे उल्लेख गरेकी छन् ।
